Mae Aelod Plaid Cymru o'r Senedd wedi siarad yn erbyn Llywodraeth Torïaidd San Steffan mewn rali gwrth-hiliaeth a gynhaliwyd ym mhrifddinas Cymru.

Siaradodd Peredur Owen Griffiths, sy'n cynrychioli rhanbarth Dwyrain De Cymru, yn y digwyddiad ddydd Sadwrn a drefnwyd i nodi Diwrnod Rhyngwladol y Cenhedloedd Unedig ar gyfer Dileu Gwahaniaethu ar Sail Hil.

Dywedodd Peredur wrth y dorf fawr o bobl bod y Torïaid yn creu'r amodau i grwpiau asgell dde eithafol ehangu a ffynnu mewn rhannau o'r DU gyda'u rhethreg beryglus ynghylch ffoaduriaid. 

Dywedodd: "Gyfeillion, rydyn ni'n byw mewn cyfnod peryglus iawn. Mae'r dde eithafol yn mynd yn feiddgar a swnllyd.

"Maen nhw'n cam-ddefnyddio’r amodau i gyd-fynd â'u hagenda ffiaidd a chynhennus eu hunain. Yn eu byd nhw, mae'r bobl sydd ddim yn edrych fel nhw yn dod yn elyn.

"Maen nhw'n gwneud ‘scapegoats’ allan o ffoaduriaid, o'r bregus, ac o'r bobl sydd ddim yn ffitio eu templed.

"Maen nhw'n gosod y bai am bethau fel ein heconomi fregus, costau byw cynyddol, a chymaint mwy, ar ffoaduriaid ac unrhyw un arall sydd ddim yn ffitio yn eu byd.

"Ond rydyn ni'n gwybod y gwir. Ni fyddai unrhyw ran o hyn yn bosib heb Lywodraeth Dorïaidd sydd wedi creu'r amodau i'r eithafwyr asgell dde hyn ffynnu."

Ychwanegodd: "Mae gobaith oherwydd bydd fy mhlaid Plaid Cymru yn parhau i ymladd y mesur peryglus hwn gyda'n holl nerth.

"Mae 'na obaith, oherwydd digwyddiadau fel hyn, sy'n dangos bod digon o bobl dda yn dal i fod allan yne, mae 'na ddynoliaeth o hyd ac mae 'na dosturi ar ôl yn ein cymdeithas ni o hyd.

"Mae gobaith oherwydd bydd yn rhaid i'r Torïaid ateb yn fuan am eu rhethreg ddeifiol a'u methiannau niferus yn y blwch pleidleisio. Ar ôl 13 mlynedd o lywodraeth Dorïaidd San Steffan, ni all y diwrnod hwnnw ddod yn ddigon buan.

"Ffrindiau... chi'n gwybod beth i'w wneud pan ddaw'r amser."

Os hoffech chi gefnogi Peredur a Plaid Cymru, cliciwch ar y linc yma.