Mae dau Aelod o'r Senedd wedi annog cabinet cyngor i feddwl ddwywaith cyn gwneud rhai toriadau dadleuol.

Mae Peredur Owen Griffiths AS a Delyth Jewell AS wedi ysgrifennu at bob aelod o Gabinet Cyngor Bwrdeistref Sirol Caerffili cyn cyfarfod hanfodol ar ddyfodol Llancaiach Fawr a'r Gwasanaeth Prydau Uniongyrchol.

Mae'r cyngor am gau plasty Tuduraidd hanesyddol a chau'r gwasanaeth prydau bwyd sy'n darparu prydau poeth i'r henoed a'r bregus.

Roedd cau Sefydliad y Glowyr Coed Duon hefyd ar y cardiau nes i wrthdaro buddiannau posibl ddod i'r amlwg a gohirio'r cynnig hwnnw am y tro.

Ar ôl cydnabod na fyddai tynged Sefydliad y Glowyr Coed Duon yn cael ei benderfynu ar hyn o bryd, ysgrifennodd Peredur a Delyth yn eu llythyr at Aelodau'r Cabinet: 'Rydym yn gwerthfawrogi bod hwn yn gyfnod anodd i awdurdodau lleol ledled Cymru.

 ‘Mae'r setliad cyllido wedi bod yn wael flwyddyn ar ôl blwyddyn o dan wleidyddiaeth llymder San Steffan ac nid oes fawr o arwydd bod pethau'n gwella'n fuan yn anffodus oherwydd rhagolygon ariannol difrifol a wnaed gan y Prif Weinidog a'r Canghellor presennol.

 ‘Rydym hefyd yn gwybod bod yn rhaid i awdurdodau lleol dorri eu brethyn yn unol â hynny a diogelu'r gwasanaethau statudol y maent yn gyfrifol am eu darparu.

 ‘Fodd bynnag, gwyddom hefyd na wnaethoch fynd i mewn i wleidyddiaeth i wneud toriadau a allai arwain at ganlyniadau niweidiol i'r bobl rydych chi'n eu gwasanaethu am genedlaethau i ddod.

 'Gofynnwn yn barchus i chi archwilio pob llwybr ac opsiwn i gadw Sefydliad y Glowyr Coed Duon, Llancaiach Fawr a Phrydau Uniongyrchol ar agor ac ar waith.

 ‘Unwaith y bydd yr adeiladau neu'r gwasanaethau hyn yn cau, mae yna ofnau gwirioneddol na fyddant byth yn ailagor ac yn cael eu colli am byth.

 ‘Byddem yn barod i weithio gyda chi ar sail drawsbleidiol i sicrhau bod y sefydliadau hyn a'r gwasanaethau hanfodol y maent yn eu cynnig yn gallu parhau i wasanaethu'r cyhoedd am genedlaethau i ddod.’

Os hoffech chi gefnogi Peredur a Plaid Cymru, cliciwch ar y linc yma.