Roedd Peredur Owen Griffiths AS Plaid Cymru a Delyth Jewell yn rhan o brotestiad i dynnu sylw at nifer y Palesteiniaid a laddwyd yn Gaza ers mis Hydref diwethaf.

Cynhaliwyd digwyddiad Baner Enwi'r Meirw ar risiau'r Senedd yr wythnos hon, roedd yn 200m o hyd. Roedd yn cwmpasu pedair adran ac roedd angen dwsinau o wirfoddolwyr i'w dal i fyny.

Hyd yma, mae mwy na 30,000 o farwolaethau wedi cael eu cofnodi o ganlyniad i ymgyrch lluoedd milwrol Israel, gyda'r mwyafrif o'r rhain yn fenywod a phlant.

Wrth siarad wedi'r digwyddiad, dywedodd Peredur: "Pan welwch yr enwau ar y faner, mae'n dod â graddfa'r lladd yn Gaza i ffocws.

"Y gwir amdani yw, yn y dyddiau sy'n dilyn, y bydd llawer mwy o enwau i'w hychwanegu at y rhestr a gan gynnwys plant.

"Yn anad dim, mae'n tanlinellu'r angen am gadoediad ar unwaith a gweithrediad cymorth dyngarol ar raddfa annirnadwy oherwydd y lefelau dinistr a achoswyd ar Gaza.

"Roedd yr angen am gadoediad yn glir pan bleidleisiodd y Senedd drosto ddechrau Tachwedd. Rydym bellach bedwar mis yn ddiweddarach, gyda miloedd yn fwy wedi marw.

"Mae sefyll o wneud dim byd yn anfaddeuol. Rwy'n erfyn ar arweinwyr gwleidyddol yn San Steffan a'r Unol Daleithiau i weithredu'n gyflym ac yn bendant cyn i fywydau mwy o bobl ddiniwed gael eu cymryd."

Dywedodd Delyth: "Roedd yn brofiad emosiynol iawn gweld enwau'r miloedd o bobl sydd wedi cael eu lladd - roedd yn ein hatgoffa ni i gyd bod bywydau wedi eu torri'n greulon o fyr y tu ôl i bob ystadegyn. 

"Gofynnais i bob person yno ymuno â mi mewn gweddi, i ba bynnag Dduw y gwnaethon nhw weddïo arno, neu os nad oedd ganddyn nhw grefydd, i ddal enwau'r miloedd hyn o bobl yn eu calonnau. 

"I weddïo dros yr eneidiau gwerthfawr a laddwyd yn Gaza, yn Israel, dros y gwystlon sy'n dal i gael ei dal, ac i ymuno mewn gobaith penderfynol a didwyll bod yn rhaid i'r marwolaethau hyn ddod i ben.

"Er mwyn y miloedd hyn o bobl, a phawb y mae eu bywydau yn dal i fod yn y fantol, rhaid cael cadoediad, dychwelyd gwystlon, a diwedd ar y lladd."

Os hoffech chi gefnogi Peredur a Plaid Cymru, cliciwch ar y linc yma.