Mae AS Plaid Cymru wedi galw ar y Prif Weinidog i sicrhau bod yr holl gymorth posib yn cael ei roi i 100 o weithwyr sy'n cael eu diswyddo o safle lled-ddargludyddion Casnewydd.

Roedd Peredur Owen Griffiths AS yn siarad yn dilyn y newyddion bod 100 o bobl yn cael eu diswyddo yn Newport Wafer Fab gan y perchnogion Nexperia.

Mae ansicrwydd wedi amgylchynu'r safle ers i'r Llywodraeth Dorïaidd orchymyn Nexperia dan berchnogaeth Tsieineaidd i werthu ei gyfran o 86% yn y safle oherwydd pryderon diogelwch cenedlaethol.

Galwodd Peredur, sydd wedi cyfarfod â gweithwyr ac wedi ymweld â'r ffatri, ar Lywodraeth Cymru i wneud popeth o fewn eu gallu i gefnogi'r gweithwyr sydd wedi'u clustnodi ar gyfer diswyddo a chefnogi gwerthu'r safle cyn colli mwy o swyddi.

Dywedodd: "Mae gweithwyr y ffatri wedi dweud wrth fy swyddfa eu bod yn derbyn na all unrhyw beth atal y 100 o ddiswyddiadau hyn a fydd dim yn newid meddwl San Steffan dros berchnogaeth Nexperia.

"Mae'n rhaid canolbwyntio rwan ar gefnogi'r rhai sy'n cael eu diswyddo i sicrhau eu bod yn cael yr hyfforddiant a'r gefnogaeth sydd eu hangen arnynt i ddod o hyd i gyflogaeth amgen.

"Rhaid canolbwyntio hefyd ar ddiogelu'r 461 o swyddi o ansawdd da sy'n weddill a'r nifer fawr o swyddi eraill sy'n ymateb ar y cyfleuster hwn drwy'r gadwyn gyflenwi estynedig.

"Mae'r 12 mis diwethaf wedi dangos nad yw Llywodraeth y DU yn poeni fawr ddim am y safle a'u gweithwyr felly pa gymorth ymarferol allwch chi ei gynnig i gyflawni'r ddau amcan a nodwyd?"

Dywedodd Peredur hefyd: "Mae'r ffordd y mae San Steffan wedi ymddwyn tuag at Newport Wafer Fab yn dangos pa mor bwysig yw bod gan Gymru reolaeth dros ei holl lefrau economaidd.

"Hyd nes y bydd gennym y pwerau hynny, bydd penderfyniadau yn parhau i gael eu gwneud sy'n mynd yn groes i fuddiannau ein heconomi a'n cymunedau."

Mewn ymateb, dywedodd y Prif Weinidog fod cefnogaeth yn cael ei roi i weithwyr a bod swyddogion y Llywodraeth wedi bod yn Taiwan yn ddiweddar gan ddilyn arweinwyr cyn belled ag y mae'r diwydiant lled-ddargludyddion yn y cwestiwn.

Os hoffech chi gefnogi Peredur a Plaid Cymru, cliciwch ar y linc yma.