Dywedodd AS Plaid Cymru ei fod yn "siomedig" gyda'r ymateb gan fanc mawr dros gau cangen mewn tref yng Ngwent.

Fis diwethaf ysgrifennodd Peredur Owen Griffiths at Santander ar ôl iddynt gyhoeddi y byddent yn cau eu cangen yn y Coed Duon ac yn lleihau oriau agor yn eu cangen yng Nghaerffili.

Yn y llythyr hwn, ysgrifennodd Aelod o'r Senedd dros Ddwyrain De Cymru: 'Cyn dod yn Aelod Senedd, treuliais flynyddoedd lawer yn gweithio yn y sector bancio manwerthu i gwmnïau fel Abbey, The Principality a Santander. Gweithiais am gyfnod byr yng nghangen y Coed Duon a gallwn weld yn uniongyrchol pa mor werthfawr yw'r gangen honno i'r dref a thu hwnt.

'Roedd cwsmeriaid ffyddlon Santander yn dibynnu arno am eu bancio a'r cyffyrddiad personol a gawsant y tu mewn i'r gangen.

'Roedd y gangen hefyd yn amhrisiadwy i fusnesau ffyniannus canol y dref a fydd yn cael eu gorfodi i deithio llawer ymhellach i ffwrdd wrth fancio eu henillion.

'Wrth wneud y penderfyniad hwn, ydych chi wedi ystyried yr effaith ar y rhai sydd wedi'u rhwystro yn ddigidol? Rwyf wedi bod yn llefarydd Plaid Cymru ar ran Pobl Hŷn ac rwy'n gwybod faint o broblem yw cau canghennau.

'Mae pobl hŷn yn aml yn brin o'r wybodaeth neu hyd yn oed yr hyder ar gyfer E-Bancio. Mae hyn yn wir am lawer o bobl anabl hefyd.

'Ar adeg pan mae Santander yn brolio elw enfawr sy'n rhagori ar dargedau ac yn dychwelyd 10 biliwn Ewro i gyfranddalwyr, nid yw hyn yn edrych yn dda.

'Rwy'n eich annog i ailystyried eich penderfyniad mewn perthynas â changen y Coed Duon yn ogystal â'ch penderfyniad i leihau oriau agor cangen Caerffili.'

Mewn ymateb, ysgrifennodd llefarydd ar ran Santander: 'Rwyf am eich sicrhau bod Santander wedi ymrwymo i sicrhau bod cwsmeriaid yn gallu bancio'n ddiogel gyda ni trwy ystod o sianeli, gan gynnwys yn bersonol mewn canghennau a ATMs, neu trwy ein gwasanaethau bancio ar-lein a ffôn.

'Byddwn yn cysylltu â'r holl gwsmeriaid yr effeithir arnynt yn rheolaidd dros y misoedd nesaf gyda chefnogaeth, gyda chefnogaeth ychwanegol i gwsmeriaid bregus gan gynnwys galwadau ffôn dilynol rhagweithiol gan gydweithwyr cangen.

'Fel y nodwch chi, gall cwsmeriaid hefyd ddefnyddio dros 11,000 o ganghennau Swyddfa'r Post ar gyfer eu hanghenion bancio.'

Yn dilyn yr ymateb, dywedodd Peredur ei fod yn "siomedig iawn."

"Mae banciau fel Santander yn gwneud elw blynyddol enfawr ac mae eu cwsmeriaid ffyddlon yn rheswm mawr am hyn," meddai Peredur. "Mae hon yn ffordd wael o ad-dalu pobl yn y Coed Duon a'r ardal gyfagos am eu cefnogaeth dros y blynyddoedd.

"Rwy'n siomedig iawn bod corfforaethau mawr fel Santander yn anghofio'u cwsmeriaid ffyddlon - heb sôn am y staff mewn canghennau fel y Coed Duon - sy'n gwneud eu busnes y llwyddiant ydyw.

"Ni fyddwn yn synnu pe bai cwsmeriaid Santander bellach yn pleidleisio gyda'u traed ac yn mynd â'u busnes i rywle arall."

Os hoffech chi gefnogi Peredur a Plaid Cymru, cliciwch ar y linc yma.