Mae Peredur Owen Griffiths wedi galw am fwy o gefnogaeth i ofalwyr di-dâl yn ystod Cwestiynau'r Prif Weinidog.

Gwnaeth AS Plaid Cymru dros Ddwyrain De Cymru y galwadau yn ystod Wythnos Gofalwyr sy'n tynnu sylw at y cyfraniad aruthrol y mae gofalwyr yn ei wneud i'r gymdeithas ehangach.

Siaradodd Peredur hefyd â gofalwyr ifanc yn ystod sesiwn a drefnwyd gan Ymddiriedolaeth Gofalwyr Cymru i dynnu sylw at y problemau a'r heriau sy'n eu hwynebu fel diffyg dealltwriaeth gan athrawon.

Wrth annerch y Prif Weinidog, dywedodd Peredur: "Mae ymchwil diweddar wedi datgelu bod tua 450,000 o bobl yn darparu gofal neu gymorth di-dâl yng Nghymru.

"Mae'r cyfraniad hwnnw, a anwyd allan o gariad ac anwyldeb tuag at deulu a ffrindiau, yn anodd ei feintioli. "Mae'n deg dweud bod y cyfraniad hwn i'n cymuned yn aruthrol, ac mae'n anodd dychmygu lle fydden ni heb ofalwyr di-dâl.

"Mae Plaid Cymru yn cydnabod y cyfraniad anhygoel yma wrth i ni nodi Wythnos Gofalwyr."

Ychwanegodd: "Canfu'r adroddiad a ddatgelodd yr ystadegyn syfrdanol hwn hefyd fod 35% o'r gofalwyr a holwyd yn dweud bod eu hiechyd a'u lles wedi bod yn dioddef o ganlyniad i ofalu.

"Rwy'n nodi, yn eich ateb yn gynharach ac yn natganiad y Llywodraeth yr wythnos hon, am gyllid ar gyfer seibiant gofalwyr a seibiannau byr.

"O ystyried bod mwy na thraean o ofalwyr di-dâl yn dioddef, a ydych chi'n hyderus bod y cyllid yn mynd yn ddigon pell ac y bydd yn cael ei ddefnyddio'n ddigon effeithlon?"

Mewn ymateb, dywedodd Mark Drakeford "... Mae mwy y gellid ei wneud bob amser pe bai cyllid pellach ar gael gennym."

Os hoffech chi gefnogi Peredur a Plaid Cymru, cliciwch ar y linc yma.