Mae AS Plaid Cymru wedi croesawu fod ei blaid yn cynnal cynhadledd i drafod materion sy'n bwysig i gymunedau'r cymoedd.

Dywedodd Peredur Owen Griffiths AS bod y digwyddiad ar gyfer aelodau'r blaid, gweithredwyr a chynghorwyr ar 18 Tachwedd ym Merthyr yn gyfle i ddod at ei gilydd, trafod problemau yn y cymoedd a chreu datrysiadau posib.

Y syniad yw y bydd y digwyddiad, a fydd yn cynnwys gwleidyddion etholedig gan gynnwys yr arweinydd Rhun ap Iorwerth, yn cynhyrchu syniadau polisi i'w gweithredu yn y blynyddoedd i ddod.

Dywedodd Peredur, a fydd hefyd yn mynychu'r digwyddiad yn Theatr Soar: "Y ffordd orau o gynrychioli ein cymunedau a'r bobl sy'n byw ynddynt yw cadw mewn cysylltiad a siarad â nhw. Dyna pam rwy'n cynnal cymhorthfeydd stryd yn rheolaidd ar draws fy rhanbarth.

"Os ydw i am gynrychioli pobl hyd eithaf fy ngallu, mae angen i mi gadw mewn cysylltiad â phobl. 

"Mae Plaid Cymru wastad wedi bod yn blaid sydd wedi'i gwreiddio yn y cymunedau mae'n eu cynrychioli ac mae Cynhadledd y Cymoedd yn ddiweddarach y mis hwn yn estyniad o'r athroniaeth honno.

"Bydd y gynhadledd yn dod â phobl o bob lefel o'r blaid at ei gilydd fel y gallwn drafod y materion a'r problemau a welwn mewn yn ein trefi a’n pentrefi. Gobeithio y gallwn gynnig atebion posibl o ganlyniad.

"Rwy'n gobeithio y bydd yr ymarfer hwn yn llywio gwaith grŵp y Senedd ac yn darparu syniadau ar gyfer maniffestos dros y blynyddoedd nesaf.

"Mae hefyd yn anfon neges glir bod Plaid Cymru yn gwrando ar y cymoedd a'n bod ni'n deall."

Os hoffech chi gefnogi Peredur a Plaid Cymru, cliciwch ar y linc yma.